බෙන්තොට ප්‍රාදේශීය ලේකම් කාර්යාලය

බෙන්තොට ප්‍රාදේශීය ලේකම් කොට්ඨාසයේ ඉතිහාසය

ජනප්‍රවාද වලට අනුව බෙන්තොට ප්‍රදේශයට නම් පටබැදී ඇත්තේ එවකට බෙන්තර ගං තොටට අරක් ගත් “බෙම්” නැමැති යක්ෂයාගෙන් බව පැවසේ. මුල් කාලයේ දී මෙම යක්ෂයා නිසා ප්‍රසිද්ධ වූ බෙම්තොට පසුව ජනවහරේදී බෙන්තොට වූ බව විශ්වාස කෙරේ. එමෙන්ම අතීතයේ දී අප රට පාලනය කළ ලන්දේසීන්, බෙන්තොට මුහුදු තීරය ඔස්සේ ලංකාවට ප්‍රවිශ්ඨ වීමේ නැව් තොටක් ලෙස ද භාවිතා කර ඇත.

බෙන්තොට ප්‍රදේශය ඵෙතිහාසික වශයෙන් ඉතා ඈත අතීතයකට දිවයන ඉතිහාසකට උරුමකම් කියනු ලබයි.ඵෙතිහාසික වශයෙන් වැදගත් වන බෝධි සමීප රජමහා විහාරය, වනවාස රජමහා විහාරය, ගනේ පුරාණ රජමහා විහාරය, බෝධිමළුව රජමහා විහාරය  හා ගලපාත රජමහා විහාරය යන විහාරස්ථාන පහක් කොට්ඨාසය තුළ පිහිටා ඇති අතර මෙම විහාරස්ථාන සම්බන්ධ කරමින් යා හැකි උමං මාර්ගයක් ද එකල පිහිටා තිබූ බවට පුරා විද්‍යාත්මක සාධක හමු වී ඇත. දුටුගැමුණ රජුගේ සොහොයුරු සද්ධාතිස්ස කුමරු විසින් යුධ සේනා රැස් කිරීමේ දී මෙම ප්‍රදේශයේ රැදී සිටි බවත් එලෙස සෙබළුන් සිටි ස්ථානයක් ලෙස කයිකාවල ප්‍රදේශය යොදාගත් බවත් සඳහන් වේ.

බෙන්තොට ප්‍රාදේශීය ලේකම් කාර්යාලයේ පිහිටීම

කොළඹ දෙසින් පැමිණෙන විට, අළුත්ගම නගරයේ සිට කි.මී 03ක දුරකින් හා ගාල්ල දෙසින් පැමිණෙන විට කි.මී 69ක දුරකින් ගාලු පාරට මුහුණලා, බෙන්තොට ප්‍රාදේශීය සභාවට යාබදව අප කාර්යාලය පිහිටා ඇත.

බෙන්තොට ප්‍රාදේශීය ලේකම් කාර්යාලය විසින් මහජනතාව සඳහා කාර්යක්ෂම සේවාවක් ලබා දීමට මානව හා භෞතික සම්පත් පහසුකම් සලසා දී ඇත. සේවාලාභීන් සඳහා තෘප්තිමත් හා කාර්යක්ෂම රාජ්‍ය සේවයක් ලබා දීමට සංවිධානාත්මක ආයතන ව්‍යුහයක් සමඟ ඵලදායී ලෙස ආයතනය සතු මානව සම්පත් මෙහෙය වීම සිදු කරනු ලබයි. දිනකට සේවාලාභීන් 150 - 175 අතර ප්‍රමාණයක් තම සේවා ලබා ගැනීමේ අරමුණින් අප කාර්යාලය වෙත පැමිණේ. ඊ - රාජ්‍ය සේවා  සංකල්පය ඔස්සේ යමින් නව තාක්ෂණය භාවිතයෙන් මහජනතාව වෙත කඩිනමින් සේවා සැපයීමට අප කාර්යාලයේ පහසුකම් මේවන විටත් සලසා ඇත.

වර්ෂ 1960 සිට 2010 දක්වා දිවයින තුළ සියළුම උපැන්න, විවාහ හා මරණ සහතික නිකුත් කිරීමේ පහසුකම් රෙජිස්ට්‍රාර් අංශය තුළ සතුය. එමෙන්ම කොළඹ, ගම්පහ හා කුරුණෑගල දිස්ත්‍රික්කවලට අදාල උප්පැන්න, විවාහ හා මරණ සහතික 2015 වර්ෂය දක්වා නිකුත් කිරීමේ හැකියාව ඇත. තවද දකුණු පළාත තුළ සියළුම වාහන අදායම් බලපත්‍ර නිකුත් කිරීමේ පහසුකම අප සතුය.

බෙන්තොට කොට්ඨාසය භාරව සිටි පරිපාලන නිලධාරින්